Wajibi ye sɔrɔdasiya kalanw kεli ye : Kulu 5nan ye kεnε minε

Faso denmisεnw ka sɔrɔdasiya (SNJ) kulu 5nan ye kεnε minε kunun SNJ dukεnε na. U bε bisimila Bafo sɔrɔdasiya kalanyɔrɔba la u ka wajibi sɔrɔdasiya kalanw kama kalo 6 kuntaala. U kεli ka kεnε minε, o lajε ɲεmɔgɔya tun bε denmisεnya, ni farikoloɲεnajε ka ɲεsin fasodenya ladamuni ani fasoden ɲuman dilanni minisiri Abudulu Kasimu Ibarahimu Fɔnba bolo. SNJ ɲεmɔgɔba Kolonεli Cεmɔkɔ Kamara ni maaba welelen caman wεrεw tun b’a kεnε kan.

Nin mɔgɔ 850 kura talenw bε jate kalansoba ENA baarakεla kalandenw, sigidaw tɔgɔla lakɔlikaramɔgɔw, kiirikow sεgεsεgεbaaw, kiiritigεlaw dεmεnbaa ɲεmɔgɔw, ka fara kulu 4nan mɔgɔ tɔ minnu tun ma sɔrɔdasiya kalan in kε. Kɔnbilen bulaman b’u bεε la, kasiki b’u kunw na, minεnw b’u bolo ; n’o y’u ka bɔrεw, palanw, furannanw ani fεn wεrεw ye.

Kulu in na, nɔɔrɔ dugannen don ka bɔ dɔw ka yeli ma ; olu ta bε kε siwiliya faamuko ɲuman kalanw ye. Taali in hukumu kɔnɔ Bafo, u somɔgɔw, u teriw, olu bɔra ka caya k’u bilasira. O bilasiralikεla caman ni ɲεji tun bε ɲɔgɔn na u balimaw taatɔ nɔfε. Nka dɔw fana tun bε fototaw la hakililajiginnan kama, yanni kaariba 9 ka baarakεla kura ninnu cε ka sira minε n’u ye.

Taali bεna kε kalo 6 sɔrɔdasiya kalan min na Bafo, farifoniw, sɔrɔdasiya kalanw ani hakilidayεlεli kalan b’a la. O baara kεtaw b’a to yεrε minε hakilila, fasodenɲumanya hakilila, fasodenya hakilila, tilennenya, fasokanu ani yεrεdi hakililaw ka yiriwa u la.

Denmisεnya, ni farikoloɲεnajε ka ɲεsin fasodenya ladamuni ani fasoden ɲuman dilanni ma, o minisiri Abudulu Kasimu Ibarahimu Fɔnba ye ɲεfɔli kε. A y’a jira, ko nin kalan in bε dabɔ ka baarakεla kura ninnu kε faso kanubaa jɔnjɔnw ye ; n’o ye Mali ye. Abudulu Kasimu Ibarahimu Fɔnba ka fɔ la, nin ye sira ye, min fε, balimaya bε banba u cε, kelenya ani u tin bε don ɲɔgɔn na ka taa a fε. Ɲɔgɔnbonya, kolonnenya ani faso baara kεcogo ɲuman hakililaw bε don u la a ɲεma. U bεna jamana faamuya kosεbε, ka faso tɔgɔla baarakεla jɔyɔrɔ dɔn kosεbε, ka kalan kε, ka faso lafasa, ka baara kε a ye, ani k’u ka kεtaw dɔn a ɲεma.

Minisiri fε, kalan in bεna a to u k’u cogoya dɔn faso darapo kɔrɔ, o min kofɔlen don kosεbε sariyaw kɔnɔ ani kεrεnkεrεnnenya la, Mali baarakεlaw ka ko la. Nin sɔrɔdasiya kalan in kuntaala kɔnɔ, baarakεla tun bε kalosara min ta, a t’o sɔrɔ bilen ; a dan ye a ni sɔrɔdasiyasara min ka kan. Minisiri Fɔnba ye hakililajigin kε, ko denmisεnw ka sɔrɔdasiya ye jamana ka fɔcogo ani furancεlafanga jamanakuntigi Kolonεli Asimi Goyita kuntilenna ye, k’a ɲinin, segin ka kε denmisεnw ka wajibi sɔrɔdasiya kalan ma n'i tara gɔfεrεnaman tɔgɔla baara kama.

Mɔgɔ fεn o fεn y’a kalan in kε, yεlεma ɲuman kɔlɔsira a bεε kεcogo la, ka tεmεn u tun bε cogoya min na sanni u k’a kε. Abudulu Kasimu Ibarahimu Fɔnba ye foli lase baarakεla kuranin ninnu ma, ka da u nafa kan. Ka sɔrɔ k’a ɲinin u fε, u ka muɲun, ka sabali ani k’u yεrε di kalan in ma. A labanna k’a jira u karamɔgɔw la, u ka sɔrɔdasiya kalan wasalen kε denmisεn ninnu kun.

SNJ ɲεmɔgɔba ye jigisigi kuma fɔ. A y’a jira ko kalanden baarakεla kura ninnu bε bolo ɲuman kan ; sabula u bε karamɔgɔ faamuyalenbaw bolo, minnu bεna u kalan marifa la ani sɔrɔdasiya kunkanko tɔw la. Kolonεli Cεmɔkɔ Kamara y’a ɲinin mɔgɔ talen kura ninnu fε, u ka tilen, ka kolon ani ka ye bila sanga ni waati bε la.

Sariya n°2016038 min tara san 2016 zuluyekalo tile 7, o sariyasen 6nan b’a jira, ko Mali denmisεn fεn o fεn, n’o ma sɔrɔdasiya kalan sɔrɔ, o bεε wajibiyalen don k’a kε.

Mohamεdi JAWARA

Dɔkala Yusufu JARA