A masalakun ye : « ka jɛ ni denmisɛnya ye yuruguyurugu kɛlɛli la, ka sini dafalenya dilan ». Yuruguyurugu kɛlɛli dɔgɔkun kelen wulikajɔ baaraw nun donna kunun kiiriko, jamana taamasiyɛnw marali ani hadamadenw ka hakɛw labatoli minisiri Mamadu Kasoge fɛ. A kɛra Bamakɔ lajɛkɛsoba Seyisebe (CICB) la. Mazisitaraw, fangabulon minnu sen b’a ko la ani lasigiden minnu b’an ka jamana kɔnɔ, nin bɛɛ tun b’a kɛnɛ kan. Dɔgɔkun ye cogoya ye walasa ka se ka lafaamuyali kɛ ka taa a fɛ masalakun sugandilen kan, ka kɛɲɛ ni yuruguyurugu fanga bonya cogoya ye.
Baara kɛta dɔw bolodalen don dɔgɔkun kelen in kuntaala kɔnɔ cakɛdaw ni jɛkuluw fɛ, minnu bɛ wulikajɔw la yuruguyurugu kɛlɛli la. Denmisɛnw caya kama, u jɔyɔrɔ an’u ka kɛta suguya caya kama, u labilalen don yuruguyurugu ye, ka tɛmɛn kulu tɔw kan, ka da a kan u nɛgɛn ka di ni surɔfɛnw ye. O denmisɛnw ni fanga ani cakɛdaw cɛ kɔnɔ, olu de bɛ ye sirajuru fɔlɔ kan yuruguyuruguko la. U dɔw bɛ wajibiya ka wari sara walasa u ka se ka taa kalanyɔrɔ la, ka kiimɛni dɔ latɛmɛn walima ka baara dɔ sɔrɔ.
Kiiriko minisiri ka fɔ la, a caman na, ka wari sara walasa i mako ka ɲɛnabɔ ani ka nimisa o kɔfɛ i si kuntaala tɔ kɔnɔ n’o kɔlɔlɔ juguw ye i m’a dɔn k’a bɛ se o bɛɛ yɛrɛ ma, o kɛra dakun ye, i wajibiyara ka min kɛ k’i ka baara fɔlɔ sɔrɔ walima ka jɔyɔrɔ dajiralen dɔ sɔrɔ sangaɲɔgɔnma tile in na. A ko mɔgɔ ka kan k’a to i hakili la, ko baara sɔrɔli laadiriya ani sɛbɛ kɔnɔ, o ye hakililatigɛ ye ; wa o bɛ sara i ye, fo k’i lakodɔn n’a ye. A ko mɔgɔ minnu bɛ yuruguyurugu gɛlɛyaw kɔnɔ kosɛbɛ, o fanba ye denmisɛnw de ye.
Ani fana, Mamadu Kasoge y’a jira ko denmisɛnw hakɛ de ka ca kosɛbɛ. O b’a jira k’u fanga bɛ se ka bonya yɛlɛma ɲuman donni na kow cogoyaw la jamana kɔnɔ, ani yuruguyurugu kɛlɛli la diɲɛ kɔnɔ. O la, a ka gɛlɛn ka ɲɛtaa kuraw sɔrɔ n’an ma denmisɛnw fara an kan, fo k’u bila an ɲɛ. Nin de ye ɲinan masalakun hakilila ye.
Kiiriko minisiri bolo, a ɲuman ye ka mɔgɔ kuraw labɛn k’u ladamu dafalenya, demokarasi ani jɛlenya bonya kɔnɔ. K’olu kɛ fɛɛrɛ ɲumanw ye jigisigi la sininakow la, yuruguyurugu kuma tɛna fɔ min kɔnɔ ko fosi la. Kɛrɛnkɛrɛnnenya la lakɔli ni balikukalan bɛ se ka dɛmɛn don laɲininw sabatili la, ani k’u labaara yɛlɛma ɲuman donni na yecogow la.
KIIRIKO SARIYAW- Kiiriko minisiri ye hakililajigin kɛ ko dabali caman tigɛlen don jamana ɲɛmɔgɔw fɛ yuruguyurugu kɛlɛli kama. O siratigɛ la, a da sera bulonba jɛnni ma ni ɲangilisariya an’a tɛmɛnsira sariyaw ye ɔkutɔburukalo tile 31 tɛmɛnnen in na. Olu ye jigisigiba ye yɛlɛma ɲuman donni na kiiriko cogoya la an ka jamana kɔnɔ. Jɛnni n’o sariya ninnu ye, o bɛna dɛmɛn don yɛlɛma ɲuman donni na kiiriko sariyaw la yuruguyurugu kɛlɛli la, ani kojugukɛlaw ɲangibaliya dabilali la. Ko kura minnu farala sariyaw kɔnɔkow kan, o y’o ɲɛsigi.
Nin ɲɛtaa sɔrɔlenw tɛna se ka mako ɲɛ, ni yuruguyurugu kɛlɛ ma kɛ a ɲɛma, kiiriko sigidama bɛɛ k’a jɔyɔrɔ fa a la. O siratigɛ la, kiiriko, jamana taamasiyɛnw marali ani hadamadenw ka hakɛw labatoli minisiri y’a jira ko ale ka minisiriso b’a seko la, dɔ farali kama kɔlɔsili kɛcogo kan, min bɛna kɛ sanga ni waati bɛɛ la foroba nafolo lakananni ani ɲangiliw kama.
Minisiri Kasoge ye foli kɛ jaabi ɲuman sɔrɔlenw na Bamakɔ kuuru dasizi fɛ o ka kɔsa in na sigili la ; o min tun ɲɛsinnen bɛ faso nafolo yuruguyuruguli ani a burujali kiiri ma. O la, ɲangiliwari minnu binna a tigilamɔgɔw kan, o ka ca ni sefawari miliyari 11 ye. Minnu sera ka wari sara k’o don u ni kasoladon cɛ yanni u ka kiiri don cɛ, o cayara ni miliyari 15 ye. Minnu fana ye dɔ sara u nɔminɛkun na, o hakɛ sera miliyɔn 330 ma foroba nafolo yuruguyurugulenw hakɛ la.
O jaabi ɲuman na, jamana taamasiyɛnw marabaa b’a ɲinin mazisitaraw fɛ u ka dɛmɛn don kosɛbɛ sebaaya ka se ka sɔrɔ yuruguyurugu kɛlɛli la an sago la. Ani ka denmisɛnya kunnafoni baara kɛtaw la, minnu bɛ sen na yuruguyurugu kɛlɛli hukumu kɔnɔ. Kolabɛnkulu ɲɛmɔgɔ Dr Bubakari Sidiki Jara kɛlen kɔ ka yuruguyurugu kɛlɛli dɔgɔkun kelen wulikajɔ in sigicogo an’a laɲininw ɲɛfɔli kɛ, n’ale yɛrɛ ye kiiriko minisiriso sekeretɛri zenerali ye, baara minnu bolodalen don dɔgɔkun kelen kuntaala kɔnɔ, a y’olu dantigɛ. Lafaamuyali kanpaɲiw, barosigiw ani baara kɛta suguya caman wɛrɛw b’a la.
Dɔkala Yusufu JARA
Umaru JAKITE
Dɔkala Yusufu Jara
Taamako cakɛdaw ka fɔ la, kasaara seereyasɛbɛn (PV) dilanni de bɛ waati jan ta. O de kosɔn k’u bɛ se ka dɔ da kalo kan tuma dɔw la fo ka se san ma, k’a sɔrɔ asurelen ma bila a hakɛ kɔnɔ.
Denmisɛnw bɛ ka kalan bila ka firi Kɔfilacɛ damanda kan Kangaba sɛrɛkili kɔnɔ kosɛbɛ sisan. Cɛmannin fara musomannin kan, u kɛlen bɛ ka Kɔfilacɛ damandaw fa tewu digɛn senni ani damanbɔgɔw koli kama sanu nɔfɛ. U bɛ firi dugukolo jalan kan i ko fɛn wɛrɛ, k’u jigi dalen to sa.
Kow gɛlɛyara Mali bolo. An tɛ se k’a fɔ fɔcogo wɛrɛ la n’o tɛ, Mali dɛsɛlen kɔ Santarafiriki la 0-0 kunun ntɛnɛn marisikalo tile 24 san 2025, kupudimɔni san 2026 ɲɛbila ntolantanw tile 6nan hukumu kɔnɔ.
Taamasiyɛnnanw jɔra Bamakɔ ani jamana marayɔrɔ caman faabaw la k’a daminɛ san 1992 la, walasa ka hakililajigin kɛ Malidenw ka wulikajɔba la demokarasi nɔfɛ.
Lajɛ in ɲɛmɔgɔya tun bɛ minisiriɲɛmɔgɔ Zenerali de diwisɔn Abudulayi Mayiga bolo. A y’a gɛlɛya cakɛdaw ma, minnu bɛna degedenw sɔrɔ, u ka baaradege sarati fɔ ka gɛlɛya u ye.
Denmisɛnninw (cɛmanw ni musomanw) bɛ nin laadalako in kɛ ni sunkalo ye tile 10 sɔrɔ. Laada min don, hakilimaw ka fɔ la, a bɛ ɲɔgɔndɛmɛn ani ku-ɲɔgɔn-kan hakilila de kofɔ.
