O siratigε la, jamanakuntigi y’a gεlεya gɔfεrεnaman ma, wari min bolodara yεrεmahɔrɔnya sanyεlεma laɲεnamayali kama, o ka kε ka kojugubakεlaw ka mɔgɔ bɔnεnenw ni joginnenw somɔgɔw bolomadεmεn. Taasibila in kεra jumadon Salamatu Mayiga tɔgɔla frarikoloɲεnajεkεyɔrɔ la, ka ɲεsin baton « Tumutu » bonni, ani dan karila Gawo, Banba ani Burεmu sɔrɔdasiw dagayɔrɔ minnu na, olu ma. A lajε ɲεmɔgɔya tun bε minisiriɲεmɔgɔ Dr Sogεli Kokala Mayiga bolo.
Hakililajigin na, jamana ka yεrεmahɔrɔnya sanyεlεma sεtanburukalo tile 22 laɲεnamayali hukumu kɔnɔ, jamanakuntigi Kolonεli Asimi Goyita ye dugawudon kε banbaatɔw n’u somɔgɔw ye, ka laban ka nɔgɔyada kε joginnenw ye. A y’a jira ko kojugubakεlaw ye nin dansagonwale min ta ka siwiliw sεgεrε, a ɲangibali tεna to ; wa ko sεgεsεgεliw bolodara, n’u sɔrɔla, u ka bila kiiri ka bolo kan.
Silamεdiinε ani kerecεndiinε, o ɲεmɔgɔw tun bε kεnε kan. A bεε ye dugawudon kε, ka laban k’a ɲinin Ala fε, a k’an tinw don ɲɔgɔn na ka taa a fε, k’a to fana, an se ka ku ɲɔgɔn kan. Diinεkow minisiri ka ciden ye sanga kelen wulikajɔ ɲinin, ka kε taasibila ye ka ɲεsin baton « Tumutu » mɔgɔ bɔnεnenw ma.
Muso, den ani denbaya ɲεtaa minisiri Madamu Kulubali Mariyamu Mayiga fana ye kuma ta, ka dugawudon kε. A y’a jira ko an ka jamana bε gεlεya kɔnɔ, an bε kεlε la o bε waati jan bɔ, a ɲuman ye k’an bolo di ɲɔgɔn ma k’an disi da o gεlεya la Maliden bεε ka hεrε sɔrɔli kama. Minisiriɲεmɔgɔ ka fɔ la, nin lajε in b’a kun bɔ, ka taasibila kε ka ɲεsin an balima bɔnεnenw ma baton "Tumutu" bonnen ani dan karilen sɔrɔdasiw dagayɔrɔ minnu na Gawo, Banba, ani Burεmu sεtanburukalo tile 07, 08 ani 12 san 2023, ka fara Lere taw kan. A ko nin ye ɲɔgɔndεmεnko dɔ ye, ka fara tile saba sangabondasigi min kεra jamana kɔnɔ ka tεmεn a ko in na.
Dr Sogεli Kokala Mayiga ye wele bila Maliden bεε ma, an k’a faamuya, ko an ka jamana siniɲεsigi y’a demisεnw ye, wa fosi tε bɔ kɔkan ka na ɲε anw ma yan, an ma min laɲinin an yεrε ma yan. An ka ɲɔgɔn tin minε, ka da an ka lakananbaaw la. An kana sɔn mɔgɔ wεrε si ka don an n’an hakili cε, Mali tε kε dɔwεrε ye Malidenw hamina kɔ. Kεlε min binnen filε an kan, an kun b’a kɔrɔ fo k’a ko se a dan na don min na. A ye jigisigikuma fɔ, ko muso minnu denw an’u furucεw tora janfa in na, jamana tεna ɲinε u kɔ. Hakililajigin na, mɔgɔ 407 minnu ni tangana baton « Tumutu » bεnni na, dεmεn kεra u ye arabadon sεtanburukalo tile 20 san 2023. Jamanakuntigi ye yamaruya di sefawari miliyɔn 107 ka tila u cε. O bεnna u bεε d50 000 ma.
Suleyimani Sidibe
Dɔkala Yusufu Jara
Visite du PM du Niger.
Réflexion sur la démocratie.
Transfert de compétence.
Semaine nationale de l'harmonisation des symboles de l'Etat.
Vote de loi de finances 2026.
Rencontre sur l'AES.
