Furancɛlafanga jamanakuntigi Kolonɛli Asimi Goyita ka pankurun cunna Beyijingi Siniwajamana na kunun kari sɛtanburukalo tile 1lɔ san 2024, u ka lɛrɛ 14 waati la, Sini-Afiriki lajɛba 9nan (Focac) la, o min bɛ daminɛ sɛtanburukalo tile 4 ka se a tile 6 ma. A kunbɛnni kɛra a damanalajɛ ye, ka sɔrɔ ka taa a bisimila a dagayɔrɔ la. A ka baarakɛjɛkulu kɔfɛ, gɔfɛrɛnaman minisiri caman bɛ jamanakuntigi nɔfɛ taama in na.
Kɛrɛnkɛrɛnnenya la, lafasa ni sɔrɔdasi kɔrɔw ka minisiri Kolonɛli Sajo Kamara, kɔkankow ni diɲɛ tɔnbaw cɛ koɲɛnabɔ minisiri Abudulayi Jɔpu, wariko ni nafoloko minisiri Aluseni Sanu, iziniko ni jago minisiri Musa Alasani Jalo ani yeelenko ni jiko minisiri Bintu Kamara. Lajɛba in masalakun ye : «Ka baara kɛ ɲɔgɔn fɛ ka yɛlɛma kuraw ɲɛtaa sabati ani ka siniɲɛsigi sigida kelen dilan Siniwajamana ni Afiriki kelenna b’a niyɔrɔ sɔrɔ min na».
O siratigɛ la, (Focac) san 2024 in bɛna kɛ nafasɔrɔdaba ye, dɔ farali la Mali ni Siniwajamana cɛ jɛɲɔgɔnyasiraw kan ; kɛrɛnkɛrɛnnenya la, iziniko la, sɛnɛ baara yɛlɛma kuraw la, sekow ni dɔnkow yiriwali la, ka fara jɛkabaarako jɔnjɔn wɛrɛw kan Mali yiriwali nasira la. Furancɛlafanga jamanakuntigi yeli kɛnɛ in kan, o b’a nafa kofɔ Mali ni Siniwajamana cɛ jɛkabaarako la. Kolonɛli Asimi Goyita bɛna a sinsin lajɛba in kan, ka kumaɲɔgɔnya kɛ ni Siniwajamana jamanakuntigi ye.
O kɔrɔfɔ fanba bɛ sɔn ka boli Mali ni Siniwajamana cɛ poroze nafamabaw kan, minnu waleyali bɛ sen na Mali kɔnɔ k’a daminɛ san 2024 na ka se 2029 ma ; nafolo kura ɲininni, poroze ŋaniya sirilen dɔw waleyali kama an ka jamana kɔnɔ. mɔgɔ bɛ se k’a fɔ ni hakililatigɛ ye, k’o poroze nafama dɔw Mali bolo, o ye lafasa ni lakananko ye ; yeelenko, dugujukɔrɔfɛnko ni iziniko, ka fara kalanko kan. Ninnu ye dakunw ye, Siniwajamana bɛ sɔn ka jaabi jɔnjɔn di minnu na jamana fila ninnu fasojamaw ka hɛrɛ kama.
Lajɛba in baara bolodalenw kɛrɛfɛ, Kolonɛli Asimi Goyita bɛna ɲɔgɔnyew kɛ ni maaba caman ye ; Siniwajamana jamanakuntigi Ki Jipingi b’o la. Kumaɲɔgɔnyaw bɛna kɛ mara kɛcogo ɲuman, bɛn ni basigi, sɛnɛ, hakilila «Cɛsirijala ani sira» ; Ɲɔgɔnyew bolodalen don ni yen gɔfɛrɛnaman baarakɛla dɔw ye ani ka taa u ɲɛ da cakɛda dɔw kan.
Dɔkala Yusufu JARA
Massa SIDIBE
K’a daminɛ a sigidon na fanga la zuwɛnkalo tile 7 san 2021, ka se bi ma, furancɛlafanga jamanakuntigi Zenerali darimɛ Asimi Goyita bɛ baara la su ni tile walasa ka se ka Mali basigi. Ani kɛrɛnkɛrɛnnenya la, min b’a to an ka jamana bɛ se k’a ka yɛrɛya sɔrɔ ko caman na.
Kumaɲɔgɔnya dɔ senfɛ Mali kunnafonidilaw ɲɛkɔrɔ, jamanakuntigi Asimi Goyita da sera a ka taama kɔnɔko ma Beyijingi, Sini-Afiriki lajɛba « Fecac » tako 9nan na san 2024..
A ka ca ni sefawari miliyari 25 ye, min bɛna labila Siniwajamana gɔfɛrɛnaman fɛ an ka jamanaw ye, walasa u ka se k’u disi da yiriwali gɛlɛyaw furakli la san saba nata kɔnɔ.
Jamanakuntigi Kolonɛli Asimi Goyita bɛ Beyijingi Afiriki-Sini lajɛba 9nan hukumu kɔnɔ. A taara a ɲɛ da Siniwajamana cakɛda fila kan, minnu bɛ sɔn ka kɛ an ka jamana sɔrɔ yiriwali sababuw dɔ ye.
Jamanakuntigi fila ninnu ye ɲɔgɔnye kɛ kunun ntɛnɛn jamanakuntigiso la Beyijingi. jɛkabaarasira minnu b’u cɛ, u da sera olu ma, dɔ farali la u fanga kan o hukumu kɔnɔ, fasojama filaw ka hɛrɛ kama.
